相信一眾玩錶人仕都唔會否認，2016 年係Rolex Daytona豐收嘅一年。推出全新鋼+陶瓷 Daytona (ref.116500LN) 。然而，除咗呢個被廣泛報導嘅新玩意，Rolex喺同一場巴塞爾鐘錶展上發布咗其他新款Daytona，包括116503，佢取代咗前身 116523。今次，就等我哋一齊研究下116503 116523呢兩隻錶，搵出呢兩款雙色勞力士嘅異同。
Rolex Daytona 116523
大部份勞家可能已經好熟識不銹鋼Daytona，而黃金 Daytona近年亦得到大眾追捧。事實上，勞力士自 1960 年開始就一直生產金色 Daytona。最早期採用 Valjoux 嘅動力型號就已經配備咗所有貴金屬嘅選項。直到搭載真力時 El Primero 機芯嘅錶款上市後，不銹鋼與黃金搭配嘅雙色Daytona就開始風靡市場。隨著16523 面世，大眾可以喺相對親民嘅價錢下入手。
2000年係新一代 Daytona 系列重要嘅里程碑，發佈嘅Daytona 116523，配備全新自動機芯 Calibre 4130，因為佢係第一款內部自動計時機芯，意義重大。
Daytona 116523 配備 40 mm蠔式錶殼，旋入式計時按鈕，旋入式上鍊表冠。作為 Rolesor 型號（勞力士對雙色手錶的稱呼），採用不銹鋼和 18k 黃金，兩者都係由Rolex自己鑄造廠，使用最優質嘅礦石。不銹鋼錶殼上刻有黃金鐫刻測速儀表圈，蠔式錶鍊上嘅黃金中央鏈節由鋼鏈框框著。116523 帶有多種錶盤顏色和時標選項，但都包括 3，6，9 點位置嘅三個計時器。作為送比Daytona 24 小時耐力賽獲勝者嘅腕錶，116523 絶對係賽車愛好者夢寐以求嘅收藏品。
Rolex Daytona 116503
116523首次亮相 16 年後，就比新嘅116503 所取代。新嘅雙色Daytona除咗重新設計錶圈，外觀上同116523幾乎相同。116503邊框包括更粗嘅字體和三角形標記，而唔係圓形標記。錶圈嘅測速計刻度方向亦有所不同。另外，60 到 100 之間嘅刻度有粗黑線下劃線。而116523 採用嘅係更簡約嘅設計。
除咗 2016 年嘅新款雙色Daytona外，Rolex仲發佈咗黃金Daytona和白金Daytona嘅新版本，型號分別為 116508 和 116509。咁樣係為咗呼應該系列中較新嘅 Daytona邊框設計，包括 Everose Daytona 116505，鉑金 116506，當然仲有黑色陶瓷錶圈嘅不銹鋼 Daytona 116500LN。
另一個需要強調嘅細節係刻有 “ROLEX ROLEX ROLEX” 的 rehaut (俗稱內影），佢係喺 2000 年代中期作為防偽措施推出。跟據相應年份，116523可以係帶有光滑或雕刻嘅rehaut。
雙色Daytona兩個版本均採用40 mm蠔式錶殼，配有防刮藍寶石水晶和帶三個密封區域嘅三鎖式旋入式錶冠，防水深度達 100 米，而三件式鏈節蠔式錶鍊係該系列嘅唯一選擇。呢兩款手錶還配備 5 mm Easylink 舒適延長系統，無需工具即可快速調整錶鏈長度，而6 點鐘上方嘅小錶盤周圍有一個鮮紅色Daytona 標誌。
機芯：Rolex Daytona 116503 VS 116523
較新嘅Daytona 116503同之前Daytona 116523同樣具備Calibre 4130 自動上鍊機芯，但有幾點值得討論，勞力士多年來不斷改進 Calibre 4130 以優化性能。例如，勞力士 2000 年喺 Calibre 4130 中推出自家製Parachrom 游絲（有效增強抗磁場和抗震性），而喺 2005 年起用藍色 Parachrom 游絲則具有更好嘅長期穩定性。
取決於 Daytona 116523生產年份，可以喺機芯見到未著色嘅 Parachrom 游絲或者藍色 Parachrom 游絲。但依家所有勞力士迪通拿 116503 手錶都配備標準嘅藍色 Parachrom 游絲。
勞力士機芯另一個重大變化係喺 2015 年，當時佢地將其精度等級調整為每日-2/+2 秒。另外，勞力士仲將保修期由兩年提高到五年。提高精度等級和更長嘅保修期僅涵蓋從 2015 年開始生產嘅 Daytona 116523 手錶，即包括所有116503。
Comments